ابو ذية

تظل نجمة يا ضي العين بـ سماي
و يظل اسمك رفيق العمر بـ اسماي
ما يروي العطش بجفاك , بس ماي
العطش ترويه من تسأل عليّه



سر حبّك نِبَت بالشريان دوره
عزيز و الك بالشريان دورة
إذا شكّيت ؟ .. هاك القلب دوره
إذا غيرك لقيت بيه إعتب عليّه


عيونه سهام ترمي من يصدها ؟
و عليهـ الروح هامت من يصدها ؟
غزالة بقلبي تسرح , من يصدها
أقطعه اشلاء بـ اثنين ايديّه


بدمع عيني إكتبت لك خاطرة آني
و الك ما يوم كاسر خاطر آني
غير انت تجيني خاطر آني
إجي لك زحف لو صاير شلل بيّه


إذا دهرك يعيب إعليك عب له
و قلبي شقد تترسه هموم , عب له
إذا عنتر إنجن بـ عشق عبلة
هواكم حط جنون و طيش بيّه


إطلع من جفن عيني و ارد بيك
و أشم عطرك من خدودك , ورد بيك
صرت مثل القصيدة انت و ارد بيك
و صرت انت النبض و الروح بيّه


قلم قلبي تِدايَن ورقة منّك
لأن ماكو بصفاتك و ارقى منّك
أسجلك انت الأول و ارقمنّك
و اكتب لافتة "محجوز إليّه"

.. لا تكن مثل مالك الحزين

.. هذا الطائر العجيب الذي يغني أجمل الحانه وهو ينزف

.. فلا شيء في الدنيا يستحق من دمك نقطة واحده

******************